Isagsagut ti tubo iti Negros Oriental a ni Aiko Bangcat Eso ti panagbalinna a top 4 iti 2025 Criminologist Licensure Examination iti pimmusayen nga amana a nagbalin nga inspirasyonna a nanggun-od iti daytoy a balligina.
Iti pannaki-uman ti Bombo Radyo Vigan ken ni Eso, ti amana ti maysa a nangiduron kenkuana a mangala iti kurso a Criminology malaksid nga arapaapnan daytoy sipud adda pay laeng iti sekondarya.
Saanna pulos a malipatan nga uray agsakit idi ti amanan a kasapulandan nga ilako ti nuangda tapno laeng adda pagpaagasna ngem saan nga immannugot ti amana ta kunana nga ilaslasinna daytoy a para kenkuana isu nga idi nalakodan ket isu met ti inaramatna a pagreview.
Innayon ni Eso a tinargetna met ti agbalin a topnotcher ngem idi narigatan iti exam ket napaay ti riknanan a manggun-od isu a nagtalek laengen iti bagina a pumasa.
Dimteng met iti tiempo a naawanan iti namnama ngem tinibkeranna ti pakinakemna ken impasnekna ti nagbasa.
Iti agdama, planona ti agisuro iti review center ta kayatna ti makatulong kadagiti agar-arapaap nga agbalin met a criminologist.
