Kinumpirmaran ni US President Donald Trump nga epektibon ti ceasefire iti nagbaetan ti Israel ken Iran.
Segun iti gobierno ti Israel, inawatda ti proposal para iti ceasefire kalpasan a nagun-odda dagiti gagem ti operasyonda idiay Iran.
Kinunada a naikkaten ti pangta ti nuclear ken ballistic missiles manipud Iran, nagun-odda ti kontrol iti Tehran airspace, ken nadadaelda dagiti strategic target ti Iranian military.
Nupay kasta, adda dagiti report nga agtultuloy latta ti missile attack manipud Iran a mapan Israel a nakatayan ti sumagmamano a sibilian iti siudad ti Beersheba.
Kabayatanna,inlawlawag met ni Iranian Foreign Minister Abbas Araqchi nga awan ti ceasefire a katulaganda iti Israel, uray no adda imunan nga inwaragawag ti Amerika a marugian iti alas kuatro iti parbangon.
Segun ken ni Araqchi, no isardeng ti Israel iti panagrautda sakbay nga agalas kuatro iti parbangon, oras ti Tehran, sumardeng met ti Iran iti panagibalesda.
