Mangirugin ti administrasion ni United States President Donald Trump iti kampania tapno malapdan ti pangta ti International Criminal Court iti soberanya ti Amerika.
Dayta ti inwaragawag ni US Secretary of State Marco Rubio kagiddan ti panangibaga ti US State Department a mangisayangkatda iti ‘whole-of-nation government response’ tapno pakapsuten ti operasion ti tribunal.
Impaganetget ni Rubio a saanen a mapalubosan ti administrasion nga usigen ti ICC dagiti opisial ken kameng ti Amerika.
Karaman kadagiti maad-adal nga addang dagiti travel ban, visa revocation, naing-inget a sanction kontra kadagiti opisial ken kaalyado ti ICC, ken panangallukoy iti sabali a pagilian nga agsanud iti korte.
Nabayagen a konkontraen ni Trump ti ICC, nangruna idi nangiruar iti warrant of arrest kontra iti kaalyadona a ni Israeli Prime Minister Benjamin Netanyahu.
