VIGAN CITY – Saan a pinalubusan ti provincial quarantine ti maysa a truck a nagkarga ti karne ti manok a sumrek ditoy probinsiya uray nu kumpleto dagiti imet a papeles ti driver ken ti pahinante ta linabsan da iti quarantine checkpoint ta ti ammo ti driver ket mabalin da lattan a labsan ti checkpoint ta idi naminsan nga aldaw ket nainspect metten iti karga da.
Maipan kuma idiay Ilocos Norte dagiti nasao a karne ti manok a naggapu idiay Pampanga nga agdagsen ti nasurok lima gasut a kilo.
Segun ken ni Provincial Quarantine Officer Martel Quitoriano, pinagsubli da iti nasao a truck ta idi naminsan nga aldaw a simrek da ket adda iti laok na a karne ti baboy dagiti karga da a karne ti manok.
Gapu ta maiparit iti panangiserrek iti karne ti baboy ditoy probinsiya babaen iti naiyulog nga executive order, binilin ni Quitoriano iti driver ken ti pahinante nga agsubli da iti naggapuan da ket ikkaten da dagiti karne ti baboy a nailaok iti karga da a karne ti manok sa danto agsubli.
Idi nagsubli dan, saan da metten a nagsardeng iti quarantine checkpoint isu a kinamat ida dagiti quarantine personnel.
Kabayatanna, inlawlawag na met a mabalin a maiserrek ditoy probinsiya dagiti naduma-duma a meat products a naggapu iti sabali a lugar kas kadagiti tocino ken dadduma pay nu la ketdi ti naggapuan ti karne ti baboy a naparti ken naaramid a tocino ken dadduma pay a meat products ket adda permit na a naggapu ti Bureau of Animal Industry a mangipakita a natalged a kanen dagitoy.
