VIGAN CITY– Uppat a tattao ti nadunor iti napasamak nga aksidente ti National Highway Brgy. Naguiddayan, Bantay a nakairaman ti maysa a Mitsubishi Truck.
Nabibig ti driver iti Truck a ni Feliciano Aldiya Aquino Jr, agtawen iti uppat a pulo, residente ti Brgy. Santo Tomas, San Jacinto, Pangasinan, idinto dagiti pasaheros na ket da Reymond Chavez Del Monte, agtawen iti duapulo, Dennis Espino Flores, agtawen iti tallopulo ket walo, agpada a residente ti Brgy. Sanlibo, Bayambang Pangasinan; Romnick Soriano Sibayan, agtawen iti tallopulo ket uppat, residente ti Brgy. Bulo, San Jacinto, Pangasinan, agpapada a construction worker.
Iti pannaki-uman ti Bombo Radyo Vigan ken ni Police Major Pol Areola, naggapu dagiti uppat ti San Mariano, Bantay ken mapanda laeng kuma gumatang ti Miki wenno arroz caldo, ngem idi nakadanon da iti nakapasamakan ti aksidente naawanan ti kontrol ti driver iti manibela a rason a nadungparna ti kongkreto nga alad a kukua ni Felicidad Paet Pico.
Segun ken ni Police Major Areola, naipanda ti Ilocos Sur Provincial Hospital-Gabriela Silang dagiti uppat para iti pannakatamingda, ken basar iti attending physician da ket nagposotiboda ti alcoholic drugs.
Kabayatanna, immanamong iti makinbagi ti alad a sungbatan dagiti uppat a karaman ti aksidente ti panagpasimpa ti nadadael nga alad.
