Mangnamnama ni dati a Senador Antonio Trillanes IV ken dagiti civil society group a mapadaras ti proseso ti impeachment complaint nga impilada kontra ken ni Vice President Sara Duterte.
Ti addang ket gapu iti kalikagumda a madusa ti bise presidente kadagiti krimen a naaramidna sipud pay nagtugaw kas mayor ti Davao.
Iti pannaki-uman ti Bombo Radyo Vigan ken ni Trillanes, natalekda a makanay dagiti impasada a dokumento ken kunana a mabalin pay a nayunan daytoy ti Ombudsman no la ketdi kayatda.
Namnamaen ni Trillanes nga aramiden ti Ombudsman ti mandatoda a fact finding investigation tapno mapaneknekan a pudno dagiti intedda a dokumento.
Inyarig pay ti dati a senador ti kaso ni Sen. Bong Revilla iti impeachment complaint nga impiliada ta alisto a natignayan gapu ta nairuar a dagus ti warrant of arrest kontra iti senador isu a namnamaenna a matutukan met ti kaso ni VP Sara a binilion a pisos ti napukaw a pondo.
Ipagpaganetgetna a nasken a madusa ti bise presidente babaen ti pannakayulinto ti kasona iti Sandiganbayan.
