VIGAN CITY – Mangipaay ti Santa Local Government Unit iti fuel subsidy kadagiti tricycle operator ken driver wenno ti Santa TODA tapno mapalag-ananda iti ngimmina a presyo ti produkto petrolyo.
Iti pannaki-uman ti Bombo Radyo Vigan ken ni Vice Mayor Jeremy “JJ” Bueno, nabukel ti “Paspas Ayuda Para sa Pasada Program” a mangted iti sangaribo lima gasut a pisos a gatad ti fuel subsidy kadagiti inisyal a sangagasut siam a pulo a franchise holder iti nasao nga ili.
Naaramid ti nasao nga addang tapno saan a dagiti pasahero ti agsagrap numan bilang agtultuloy ti panagngina ti presyo ti gasolina ta mapilitan met dagiti agpaspasada nga agsingir iti nangin-ngina a plete.
Nupay kasta, obserbaren ti Santa Local Government Unit no ania ti garaw ti merkado ta no agtultuloy ti panagngina ti presyo ti gasolina ket posible a magaraw ti pondo tapno mailatang iti sumaruno a tranche kadagiti tricycle operator ken drivers.
Gas slip ket saan a kuarta ti maited kadakuada a daytoy ket isakadada kadagiti paggasolinaan. Kabayatanna, maisimsimpa met ti listaan a maipasa iti Department of the Interior and Local Government para ti tulong a mabalinda a maawat manipud iti Pantawid Pasada Program.
