Nakemmeg ti maysa a lalaki a suspek iti robbery holdup incident a napasamak iti Rizalondo Residence iti Barangay Tamag, Vigan City, Ilocos Sur.
Ti biktima ket agtawen iti tallopulo ket dua, agnaed iti Tamag, Vigan City.
Ti met suspek ket lalaki nga agtawen iti uppat a pulo ket innem, tricycle driver, taga-Bulag Centro, Bantay, ngem agnanaed iti Barangay Capangpangan, Vigan City.
Iti pannaki-uman ti Bombo Radyo Vigan ken ni PLTCOL. David Dulnuan, aglablaba ti biktima idin ta nakangngeg ti karasakas manipud iti kuarto ti katuganganna a babai.
Napan ti biktima iti kuarto ti katuganna ket nakitana idiay ti suspek.
Dagus a ginammatan ti suspek ti biktima ket pinaturonganna iti patadem ti tianna, sa binagaanna a saan nga agpukkaw.
Intaray ti suspek ti P22,300, ken gold a kwentas nga aggatad iti P20,000.
Kabayatan ti imbestigasion, nangiparang ti Vigan City Police Station iti ladawan iti posible a suspek iti biktima ket positibo met a nakumpirmana daytoy.
Malaksid dayta, innayon ni Dulnuan a bayat ti pananginspeksionda iti traysikel ti suspek idi inwayatda ti hot pursuit operation ket nakakumpiskarda ti maysa a sachet ti mapapati a shabu residue nga isu met ti idalanda iti laboratory exam.
