VIGAN CITY – Nasarakanen idiay Lidlidda ti maysa a tricycle a natakaw idiay Brgy. Polacion, Quirino.
Segun ti Quirino Municipal Police Station, ti biktima ket ni Dindo Galay Quinlat, agtawen iti sangapulo ket siam, laborer nga agnaed idiay Brgy. Bagani Campo, Candon City.
Maibasar iti pakaammo, nagreport ti biktima iti Quirino Municipal Police Station a ti binulodna nga Euro tricycle a kukua ni Marlyn Galay Gonzalo ket tinakaw dagiti saan pay a nabigbig a suspek.
Segun ti biktima a ni Quinlat, mamaturogda iti sirok iti rangtay iti Maatong River iti nasao a lugar idi nariing tapno umisbo ket nakitana dagiti saanna nga amammo a tattao a nangandar iti tricycle ket pinatarayda a nagturong iti National Road wenno iti Skyline a gappuanan iti panagreportna iti Police Station.
Insigida ngarud a naisayangkat iti hot pursuit operation ken naipakaammo kadagiti kaasideg nga ili iti panagtakawan isu a nasarakan iti tricycle idiay Lidlidda babaen kadagiti pannakabagi ti linteg iti nasao nga ili.
