Suportaran ni House Deputy Minority Leader ken ACT Teachers Partylist Rep. Antonio Tinio ti naisayangkat a transport strike idi kalman.
Para ken ni Tinio, nainkalintegan ti pannakaisayangkat ti transport strike kas sungbat iti pagkurangan ti administrasion a makaited iti umdas a tulong iti sektor ti pampubliko a transportasion iti baet ti ngumin-ngina a presio ti produkto-petrolyo.
Segun pay iti kongresista, ti kari nga ayuda ket saan pay laeng a naawat dagiti tsuper uray no mano lawasen a naapektaranda iti nagsasaruno nga oil price hike.
Nupay kasta, inyunay-unayna iti gobierno ken Kongreso a mapaalisto ti panangsulbar ken pagbalinen nga adda kaes-eskanna dagiti addang kas ti panangikkat iti buwis iti langis, pananglapped iti pananggundaway ti oil cartel, ken panangibasura iti deregulasion.
