Pinasingkedan ti transport group a Piston nga agtultuloy dagiti drayber ken operator dagiti public utility vehicle nga agprotesta ken mangaramid iti transport strike agingga a saan a masolusyonan ti gobierno ti panawaganda iti baet ti nangina a presio ti produkto-petrolyo.
Segun ken ni Piston President Mody Floranda, kasaruno daytoy ti 2 nga aldaw a transport strike ti No to Oil Price Hike Coalition a buklen dagiti jeep, bus, UV Express, ken TNVS drivers a mangipampanawagan iti panagtignay ti gobierno.
Immunan a naaddaan ti strike ti Piston idi Marso 19-20, ken simmalida manen ita iti nalawlawa a protesta.
Karaman kadagiti panawaganda iti panangikkat iti excise tax ken VAT iti fuel, panangisubli ti presio ti gasolina iti P55 kada litro, pannakaikkat ti oil deregulation law, panagpangina ti plete, ken P1,200 a family living wage.
Kiniddawda pay ti nationalization iti oil industry ken pannakaisardeng ti riribuk iti Middle East.
