VIGAN CITY – Nagsublin dagiti dadduma a trabaho idiay France ta napalukayan idi May 11 dagiti restriction iti covid-19 ta bimmaba iti kaso iti nasao a sakit.
Ti pannaki-uman ti Bombo Radyo Vigan kenni Bombo International Correspondent Froilan Esguerra nga OFW idiay Paris, France a tubo iti Bacsil, San Juan ken agdama a driver iti maysa a pribado a lugan ket nakunana nga immuna a napalubusan dagiti opisina nga agsubli iti operasyonna.
Kasta pay a kinunana nga agingga sangapulo laeng iti mabalin nga agkukuyog a tattao tapno mapagtalinaed iti social distancing ken saanen a kumaru pay iti kaso iti nasao a sakit ket agmuelta iti 135 a euro wenno katukad iti 7,000-8,000 a pisos dagiti aglabsing iti pagannurutan.
No maipapan iti trabaho ni Esguerra ket nakunana a saan met unay a naapektaran ta no man pay turista idi iti kangrunaan nga ilugluganda ket adu latta iti agluglugan nga agindeg iti manmanehoenna.
