Awan ti nadangran iti pannakauram ti Aluminak Hospitality Incorporated idiay Barangay Ambucao, Santiago, Ilocos Sur.
Iti pannaki-uman ti Bombo Radyo Vigan ken ni SFO3 Benjamin Lopez Jr., Acting Municipal Fire Marshal ti Santiago Police Station, nakangngeg ti gwardya iti nadakamat a tourist spot nga adda pimmutok ket idi talyawenna, nakitanan a dakkelen ti uram.
Napaspas a nagkayamkam ti uram iti nasao nga establisimiento gapu ta naaramid iti light materials ken naangin iti dayta a kanito.
Naibayog iti maikatlo nga alarma ti uram ken sangapulo ket maysa a firetrucks ti nagresponde tapno madepdep ti apoy.
Alas dose iti tengnga’t rabii idi madepdep ti uram ken naideklarar a fire out iti ala una iti parbangon.
Saan pay nga ammo no ania ti nagtaudan ti uram ken maim-imbestigaran no mano ti gatad dagiti sanikua a nadadael.
