VIGAN CITY- Natay ti turista a hiker a ni Jeffrey Cardenas, agtawen ti tallo pulo ket innem, miembro ti “Yapak Travellers” ken taga Bacoor ,Cavite gapu iti pannakatnag na manipud iti kangatuan a peak ti Tirad Pass idiay Gregio Del Pilar , pasado alas sais ti bigat idi November 25.
Segun kenni Police Inspector Renante Vivat, chief of police ti Gregorio Del Pilar municipal police station, manarimaan ti picture taking ti grupo ti “Yapak Travelers” ket immunan a napan ti biktima iti bangir a paset ti Tirad peak nga isu kuma ti sumarano a pagpicturan da ngem mapapati a naigalis isu a saan na a nabalanse ti bagi na ket natinnag iti derraas a ti kauneg na ket lima pulo a metro manipud iti Tirad peak.
Gapu iti dayta ket nangisayangkat ti retrieval operation dagiti kameng ti PNP, Bureau of Fire Protection, Municipal Disaster Risk and Reduction Council ken miembro ti Barangay Council ket narekobre da ti bangkay ti biktima iti pasado alas tres ti malem idi November 25.
Gapu iti napasamak, binalakadan ni vivat dagiti turista a sumurot da kadagiti pagallagadan ken precautionary measures tapno maliklikan ti aksidente nangruna ita nga umadanin ti anibersaryo ti Battle of Tirad Pass inton disyembre dos ket manamnanama nga ado dagiti bumisita a turista iti lugar.
