VIGAN CITY – “Saan a pressure ti ipangruna nu diketdi panunoten nga ag-top 1 iti eksaminasyon tapno makapasa” dayta man ti balakad ti maysa kadagiti topnotcher iti November 2022 Agriculturist Licensure Examination.
Iti pannaki-uman ti Bombo Radyo Vigan ken ni Kathleen Faye Tadeo Millare a nagadal manipod Ilocos Sur Polytechnic State College-Sta. Maria ken Top 3 iti kalkalpas nga Agriculturist Licensure Examination, rumbeng a panunoten a makapasa nu nag-exam ket kalikaguman nga adda iti umuna a listaan tapno maallukoy ti rikna ken agpanunot laeng ti positibo tapno nasayaat iti agbalin a resulta.
Segun ken ni Millare, maragsakan ken pannakkelna iti nagun-odna iti laksid nga adu ti mangtagtagibassit ken nangkukwestyon iti kurso nga innalana.
Inaminna a narigatan iti eksaminasyon ta adu dagiti saanda a na-review ngem nagtalek kadagiti nasursurona idi agad-adal pay laeng ken iti panangiyulona ti principle iti agriculture.
Dakkel pay a karit kenkuana iti panagbalinna a Magna Cum Laude idi nagturpos iti ISPSC ta amangan nu saan a makapasa ngem ammona iti bagina nga inaramidna amin a kabaelanna tapno makapasa.
Inlawlawagna a ti kurso nga agriculture ket saan laeng a maipanggep iti panagmula ta adu pay iti sabali a masursuro ket nu alaen ti nasao a kurso rumbeng a panunoten a ti gagem ket ti panangtulong kadagiti mannalon.
Nagyaman ni Millare kadagiti amin a timmulong ken simmuportar kenkuana tapno maka-adal ken makapasa iti eksaminasyon ti kurso nga innalana.
Pakaragsakan ni ISPSC President Dr. Gilbert Arce ta uppat a pulo ket tallo iti nakapasa iti pagadalanda ket adda pay topnotcher-da nga isu ni Millare.
Segun ken ni Dr. Arce, pakadanaganda iti kallabes nga amangan nu bummassit ti bilang dagiti mangala ti kurso nga agriculture ngem nakigtot ta immadu pay iti bilang dagiti agen-enroll.
Impannakkel ni Dr. Arce a kaaduan dagiti isaysayangkat a proyekto iti ISPSC ket mainaig iti agrikultura a kas iti solar power farm ken adda pay ti dua a maipapatakder a laboratory farm a mangallukoy kadagiti estudyante tapno mangala ti kurso nga agrikultura.
Kayat met nga ipamula ni Dr. Arce kadagiti amin nga agtutubo a rumbeng a saan a tagibassiten ti kurso nga Agriculture ta ipanpannekkelna dagiti nagala estudyante ken nagturpos ti nasao a kurso gapu iti dakkel a maitulongda iti panagbiag dagiti Pilipino ken panangpasayaat ti ekonomia iti pagilian.
Kinaritna dagiti nagannak a tumulongda a baliwan ti mindset dagiti annak tapno awan iti maikumkumpara a kurso ken awan ti nangangato kada nababa a nagadalan nangruna iti maipapan ti Agriculture ta nu awan ti madevelop a tattao a mangmanehar para iti ekonomia ket amangan nu awan ti panagdur-as a mapasamak iti pagilian.
