VIGAN CITY – Saan a ninamnama ni Jed Ataban Cangsan nga agbalin isuna a Rank No. 2 manipod 7,000 a nakapasa ti March 2024 Medical Technologist Licensure Examination.
Iti pannaki-uman ti Bombo Radyo Vigan ken ni Cangsan a nagadal manipod Saint Louis University, aminado a narigatan isuna ti exam isu a dakkel a yamanna ta saan laeng a pimmasa, nu diketdi nairaman pay ti listaan dagiti topnotcher.
Segun ken ni Cangsan, doble ti pressure a nariknana ta nagturpos a Magna Cum Laude isu a napalaus ti panag-review na tapno laeng saan a mapaay.
Imbingay ni Cangsan nga idi agad-adal pay laeng isuna ket dakkel a karit ti pandemia ta saan a kas iti pagadalan ti marikriknana nu adda iti pagtaenganda isu a kinaykayatnan ti naaddaan ti husto a time management tapno maaramid laeng amin a requirements-da.
Isagutna ti balligina kadagiti simmuportar kenkuana nangruna ti pamiliana.
Iti agdama, saanna pay nga ammo nu ania ti sumaruno nga addangna ngem ikonsiderarna ti agisuro kadagiti kayatna ti agala ti medical related course.
Balakadna met kadagiti napaay a saan a mapukawan ti namnama ta saan a malpas ti maysa laeng nga exam ti arapaapda ta nasaysayaat nu ipadasda manen ket agtalek ti bagi a kabaelan ken agtalek iti Namarsua.
VIDEO – REGISTED MEDICAL TECHNOLOGIST JED ATABAN CANGSAN
