VIGAN CITY – Kaso a panaglabsing ti Comprehensive Dangerous Drugs Act of 2002 ti sangwen ni Francisco Dominguez, agtawen ti tallo pulo ket pito, agnaed idiay Brgy. Nanguneg, Narvacan a nakemmeg idi kalman iti naiwayat nga anti-illegal drugs operation idiay Brgy. San Pedro, Narvacan.
Ti suspek ket top 10 priority target ti regional level ken nabayagen a sinipsiputan dagiti pannakabagi ti linteg dagiti garaw na manipud idi naamuan da iti iligal nga aramid na babaen kadagiti immun-unan a nakemkemmeg dagiti pannakabagi ti linteg idiay Narvacan nga adda pakainaigan na iti iligal a droga.
Segun ken ni Police Captain Arcadio Viloria, hepe ti Narvacan PNP, saan laeng nga idiay Narvacan iti pagilaklakuan ti suspek iti shabu no di ket pati pay kadagiti kabangibang nga ili idiay segundo distrito.
Naala kenkuana ti maysa a heat sealed sachet a naglaon ti shabu nga isu ti nagserbi a buy bust item; pito a transparent heat sealed sachet nga ikot ti suspek a naglaon ti shabu nga aggatad ti lima ribo lima gasut uppat a pulo a pisos; maysa a cellphone, duapulo a piraso ti sigarilyo, motorsiklo ken sangaribo a pisos a buy bust money.
