VIGAN CITY – Kinemmeg dagiti pannakabagi ti linteg iti Santa Municipal Police Station ti akusado a ni Raymar Bista Dameg, agtawen iti duapulo ket walo, naasawaan, mannalon, residente iti Barangay Quezon District, Santa, ken Top 1 Most Wanted Person Regional Level ti Region 4A gapu ti kaso a rape.
Iti pannaki-uman ti Bombo Radyo Vigan ken ni PCAPT. Mark Bryan Corpuz ti Santa Municipal Station, nairuar pay laeng idi 2019 ti warrant of arrest na nga imparuar ti RTC Branch 76, San Mateo, Rizal a napetsaan ti December 16, 2019 nga awan iti nairekomendar a pyansana.
Idi mapan koma kemmegen dagiti otoridad ti akusado, saanda a masarakanen gapu ta naglemlemmeng isunan ti sabali a lugar.
Natakuatanda a taga-Santa ti akusado babaen ti E-warrant, isunga nagtultuloy ti monitoring ken surveillance-da.
Inlawlawag ni Corpuz no apay a nagbalin a Top 1 most Wanted Person ti kaso a rape ti akusado, gapu ta isu ti kadagsenan a nagbalin a kaso na ti nasao a rehion.
Nagbalakad ni Corpuz kadagiti tattao nga adda warrant of arrest na nga ag-surrenderda tapno lumag-an dagiti kasoda, ken sumurot laeng kadagiti linteg tapnu maliklikan ti agkakaso.
