VIGAN CITY – Nauram iti Eldrin Tire Supply and General Merchandise idiay Zone 2, Bantay, Ilocos Sur a kukua ni Eva Marie Quindara Asuncion, agtawen ti tallopulo ket walo, naasawaan nga agnaed iti nasao a lugar.
Iti pannaki-uman ti Bombo Radyo Vigan ken ni Fire Inspector Eldie Vincent Pascua a Bantay Municipal Fire Marshal, adda ti naawatda a report inaig iti uram iti oras ti alas tres y media iti malem idi kalman isu a nagrespondeda ket nadanonanda iti nakaru nga asok manipod iti storage room iti pagtagilakuan.
Segun ken ni Pascua, umabot ti sangapulo a fire truck iti agduduma nga ili ken siudad ti naaramat tapno madepdep ti uram ket agarup alas kuatro y media iti malem idi kalman idi naideklarar a fire-out.
Saan pay nga ammo nu mano ti gatad ti inapektaran ti uram ngem agtultuloy iti imbestigasyon dagiti kameng ti BFP inaig iti nagtaudan ti uram.
