Natalek ti maysa a kongresista a nalablabes pay ngem iti kasapulan a 1/3 wenno 106 a botos ti maala para iti impeachment ni Vice President Sara Duterte.
Dayta ket kalpasan a ‘unanimously approved’ idi kalman ti committee report ken dagiti resolusyon a mangidatag iti articles of impeachment kontra ken ni VP Sara babaen iti 55-0 a botos.
Iti pannaki-uman ti Bombo Radyo Vigan ken ni ACT Teachers Partylist Rep. Antonio Tinio, saan a parikut ti panangala iti 1/3 a botos ti Kongreso iti umadani a panagbobotos ta natalek a napigsa dagiti ebidensia a mangimameg iti bise presidente.
Karaman ditan ti isyu iti confidential funds, saan a mailalawag a kinabaknang, bribery allegations, ken death threat kontra ken ni Presidente Ferdinand Marcos Jr ken dadduma pay.
Kabayatanna, insingasing ni Tinio ti panangipasa dagiti miembro ti Kongreso iti palawag iti panagbotosda ta karbengan ti publiko a maammuan no kasano a nagbotos ti tunggal maysa manipud kadagiti 318 a kongresista.
Kinuna ni Tinio a daytoy ket uray saanen a maibasa pay iti session ngem ti napateg ket maikabil iti record.
