VIGAN CITY – Mapapati a third party iti rason iti pannakatay ti maysa a lalaki a nasarakan iti bangkayna idiay Brgy. Remedios, Cervantes.
Iti pannaki-uman iti Bombo Radyo Vigan ken ni PCapt. Macario Dulawan iti Cervantes Municipal Police Station, naamuan nga adda nakariri idi kallabes ti biktima a ni Rodel Buyonen Bao-idang, agtawen iti talloulo ket lima, naasawaan, laborer nga agnaed idiay Brgy. San Luis, Cervantes.
Segun ken ni Dulawan, mapapati a nagrana ti biktima ken ti suspek a gappuanan iti insidente.
Maipalagip nga itattay parbangon ket impakaammo ni Gregorio Bucasan iti nasarakanda nga agruprupsan a bangkay ni Bao-idang iti kabanbantayan a paset iti Brgy. Remedios, Cervantes isu a nagresponde dagiti otoridad kaduada ni Dr. Alvin Alon iti RHU Cervantes ket babaen iti naisayangkat a post mortem ket naideklarar a dead on the spot ti biktima gapu iti dunor iti ulona.
Nupay kasta, agtultuloy iti nauneg nga imbestigasyon dagiti pannakabagi ti linteg inaig iti nasao a pasamak ken maisagsaganan ti kaso kontra ti suspek a nakakustodiyan iti Cervantes PNP.
