VIGAN CITY – Negatibo iti resulta ti drug test iti amin a third level officers ken dadduma a Police Lieutenant Colonels iti Police Regional Office 1 kasaruno iti pannakaidalanda iti surprise drug test ita nga aldaw iti PRO 1 Conference Room.
Ti nasao a drug testing ket insigida a naisayangkat kalpasan a nagpirma iti courtesy resignation dagiti third level officer kagiddan iti panangsuportar iti apela iti SILG ken CPNP nga amin a PNP full colonel ken general nga agipasa iti courtesy resignation-da kas paset iti tignay iti gobierno nga ikkaten dagiti opisyal a nainaig iti illegal drug trade.
Maipalagip nga indauluan ni PRO 1 Regional Director PBGen. John Chua iti whole command iti panagpirma iti courtesy resignation a sinaruno da PBGen. Carlito Gaces a Deputy Regional Director for Administration ken dagiti dadduma a Police Colonels.
Sangapulo ket pito met a third level Police Colonel Officer iti nagpirma iti courtesy resignation-na a katukad iti sangagasut a porsiento manipod iti bilangda.
Kabayatanna, umabot iti tallopulo ket uppat a senior officers iti dimmalan iti nasao a surprise drug test.
