Pinasingkedan ti caller identification service provider a Whoscall, nga umabot ti 6,157,517 text short message service scams ti naireport ti Pilipinas idi 2024.
Segun kenni Mel Migriño, ti country head iti Whoscall developer Gogolook, kaaduan kadagiti text scam ket namonitor idi maikapat a quarter idi napan a tawen nga addaan iti 2,079,968.
Idi December wenno holiday season ti kaaduan a nairepot a text scam a dimmano iti 708,005.
Inyunay-unay met ni Cybercrime Investigation and Coordinating Center (CICC) executive director Undersecretary Alexander Ramos ti panagbalbaliw dagiti text scam scheme bayat ti napalabas a kuarter.
Idi Hunio idi napan a tawen, pinakdaaran ti CICC ti publiko kontra iti panagadu dagiti text scam.
Binalakadan ti CICC ti publiko a saanda nga i-post ti ladawan dagiti ID, bank account, credit card, ken billing statement-da iti social media wenno internet.
Innayonna a rumbeng a makiuman ti publiko iti bank manager-da no adda problemada kadagiti bank account-da, ken saan a mangibingay kadagiti detalye ti digital wallet-da kadagiti bank account kadagiti saan nga amammo.
