VIGAN CITY – Binallaagan ni Technical Education and Skills Development Authority Deputy Director General John Bertiz ti publiko a saanda a gumatang kadagiti peke a national certificate.
Iti exclusive interview ti Bombo Radyo Vigan ken ni Bertiz, mabalin a mabalud wenno mamuelta ti siasino man a mainaig iti panagilakoan ken panaggatang iti peke a national certificate ta maibilang daytoy a falsification of public documents.
Malaksid dayta ket mabalin pay ma-blacklist kadagiti serserken a trabaho.
Inlawlawag ni Bertiz a ti national certification ket adda unique security features na kas ti QR code ken unique ID number ti estudiante a mabalin nga iberipika ti employer iti website ti TESDA.
Kinunana pay a saan a kasapulan a gumatang iti peke a certificate tapno makatrabaho ta awan met laeng iti maadal ken impaganetgetna a dagiti training courses ti TESDA ket libre.
