Pinasingkedan ni Senator Sherwin Gatchalian a nu adda man positibo a resulta iti pannakaimplementar iti mandatory Senior High School (SHS) level iti salinong ti K to 12 program ket ti bimmaba a teenage pregnancy kas maibasar iti report ti Second Congressional Commission in Education (EDCOM 2).
Segun ken ni Gatchalian, dakkel iti bimmabaan dagiti agsiksikog a teenager gapu ta mandatory iti panagadalda.
Kinunana a makaleppas ti panagadal ti maysa a teenager sakbay nga agsikog wenno sakbay nga agkasar.
Ti panagsarita ni Gatchalian ket kagiddan ti singasing a pannakaikkat ti mandatory SHS a basic education system iti pagilian.
Agtaltalinaed met ni President Ferdinand Marcos Jr. iti panangiduronna ti pannakapasayaat ti K-12 system nu laketdi agtalinaed ti pannakaiyetnag ti linteg nu man pay maawatanna a parikot para kadagiti nagannak ta nayon laeng a gastosda gapu iti dua pay a nayon a tawen a panagbasa dagiti estudyante.
