Nagpanawagan ti Teachers’ Dignity Coalition (TDC) ti Department of Education (DepEd) ken dadduma pay a maseknan nga ahensia a mangipaulog kadagiti nalawag a policy guidelines iti pannakaipatungpal ti Expanded Career Progression (ECP) system para kadagiti public school teachers.
Segun kenni Teachers’ Dignity Coalition chairman Benjo Basas nga iti laksid ti pannakapirma ti implementing rules and regulations (IRR) iti sistema ti ECP idi Hulio 26, agtalinaed a saan a naipatungpal ti programa gapu iti kaawan dagiti nalawag a detalye, nangruna maipapan kadagiti qualification standards para iti teachers promotion.
Dakdakamaten ti IRR ti Executive Order 174 series of 2022, a mangimandato ti expanded career progression system para kadagiti public school teachers.
Innayon ni Basas a masapul nga adda dagiti nalawag a detalye no ania ti “qualification standards” ken no ti promotion ket ma-ladderized wenno maibasar iti dadduma pay a parameters.
