VIGAN CITY – Saan a maawanan ti namnama ti Teachers Dignity Coalition nga ikonsiderar ti Department of Education babaen ti panangidaulo ni Vice President ken Executive Secretary Sara Duterte ti apelada a maisanud ti panaglukat ti school year 2022-2023 inton Agosto 22.
Iti exclusive interview ti Bombo Radyo ken ni National Chaiperson Benjo Basas, numan pay nadakamat kadakuadan ni Vice President ken Education Secretary Duterte a matuloyen ti panagsubli ti klase inton Agosto 22 agsipud ta inaprubaranen ti President Ferdinand “Bongbong” Marcos Jr. ken agtultuloyen ti maar-aramid a panagsagana ket mangnamnamada latta a maikonsiderar ti kiddawda nga agbalin a September 12 ti panaglukat ti klase.
Nupay kasta, kiniddaw met kadakuada ti bise presidente ti basis-da nga isu ti impasadan tapno adalen ti legal basis ngem saanda a paboran ti sungbat ti legal isu nga iti agdama ket namnamaenda a mabasa ti bise presidente ti impasada a rejoinder wenno sungbatda iti nasao a banag.
Innayon ni Basas a saan a gapu a kayatda laeng ti aginana no apay a kiddawenda ti naat-atiddug a bakasyon no di ket karbengan ti tunggal mangisursuro a masurot ti dati a dua a bulan a school break.
Iti agdama, agtultuloy latta ti trabaho dagiti mangisursuro manipud iti panangisayangkatda iti remedial classes, brigada eskwela ken enrolment para iti public schools.
