Pagpalpalawagen ti grupo dagiti mangisursuro ti Commission on Elections mainaig iti nayon a P1,000 honoraria a naikari para kadagiti nagserbi idi May 12 elections.
Segun ken ni National Teachers Dignity Coalition Chairperson Benjo Basas, adu ti agsalsaludsod no ayannan ti nayon a P1,000 iti honoraria dagiti nagserbi idi eleksyon, ken awan pay ti opisial a sungbat ti Comelec nupay nabayagen nga inwaragawag ti Malakanyang.
Nasurok dua lawas idi kinumpirmaran ti DBM a naiteden iti COMELEC ti pondo, ngem awan pay uray maysa a mangisursuro ti nakaawat iti P1,000 a nayon.
Kayatda pay ti malawlawagan no daytoy ket mabuwisan iti sangapulo ket lima a porsiento.
Nagpanawagan ti grupo iti Comelec a mangiruar iti pormal a pakaammo mainaig kadagitoy a saludsod ken siguradoen no maawat met laeng a dagus dagiti poll worker ti nayon a kompensasyonda.
