VIGAN CITY – Bigbigen ni Land Transportation Franchising and Regulatory Board chairman Atty. Martin Delgra III a dakkel a tulong kadagiti local ken foreign tourist, uray kadagiti agindeg ditoy probinsiya iti ka-adda dagiti taxi a pagluganan da nu adda papanan da.
Idi August 29, naisayangkat ti re-launching dagiti taxi ditoy probinsiya iti panangidaulo ni Delgra, kadua na da Vice Gov. Jerry Singson, Sangguniang Panlalawigan Member Mildred Elaydo nga isu ti mangidaulo ti Committee on Transportation ti Provincial Board, Sangguniang Panlalawigan Member Efren Rafanan kenni Sangguniang Panlalawigan Member Gina Cordero, ket sangapulo ket lima kadagitoy iti mabalinen a pagluganan dagiti tattao manipud ditoy syudad ti Vigan agingga kadagiti naduma-duma a pagpasyaran ditoy probinsiya ken kabangibang a lugar.
Malaksid iti syudad ti Vigan, naikkan pay ti taxi units ti Laoag City ta adu pay met dagiti mapmapan a turista idiay gapu kadagiti napipintas a pagpasyaran.
Ti Provisional Authority to Operate ket naipaima iti Ilocos Transport Cooperative (manipud Ilocos Sur agingga amin a lugar ti Region 1) ken Troy Darren Express (manipud Ilocos Norte ken amin a lugar ti Region 1).
Ti pannakataud iti taxi service ditoy probinsiya ket paset ti modernization program iti gobiyerno a mapabaro amin dagiti agpaspasada a lugan, nangruna dagiti Public Utility Vehicles (PUV).
