Target ti Kamara a maaprubaran iti sumaruno a bulan ti gakat a tax relief ni Presidente Ferdinand Marcos Jr tapno maipatungpal inton Enero 1, 2027, segun ken ni House Committee on Ways and Means Chairperson ken Marikina City Rep. Miro Quimbo.
Pinasingkedan ni Quimbo, a mayataday iti pammilin da House Speaker Faustino Dy ken ni House Majority Leader Sandro Marcos ket maipasa iti maikatlo ken maudi a panangibasa iti Kamara ti gakat a tax relief, tapno masigurado a masurot ti timetable ti Presidente.
Iti maika-lima nga State of the Nation Address, kiniddaw ti Presidente iti Kongres a mapalawa ti income tax exemption tapno mairaman dagiti mangmangged a makapaspastrek iti agingga P350,000 iti kada tawen; maksayan ti income tax para kadagiti dadduma pay a mangmangged; mailaksid dagiti bassit a negosio manipud iti minimum corporate income tax; ken mangted iti tax amnesty para iti saan a nabayadan nga income tax, estate tax, donor’s tax, value-added tax, ken dagiti related penalty.
Inlawlawag ni Quimbo a ti gakat a panangingato ti income tax exemption threshold ket saan a mabalin a maaddaan iti bileg wenno maipatungpal sakbay ti January 1, 2027 ta dagiti pastrek ken gastos ti gobierno para iti 2026 ket nakaprograma iti salinong ti agpampannuray nga struktura ti buwis.
