VIGAN CITY – Uppat a gasut lima pulo a ribo a pisos wenno tallo ribo a euro ti muelta dagiti siasino man nga a maduktalan dagiti pannakabagi ti linteg idiay Italy a rumuar kadagiti pagtaenganda ta nakalockdown ti pagilian gapu kadagiti adu a kaso a naimaldit iti nasao ken nakatayan dagiti adu a tattao.
Dayta ti pinasingkedan ni Bombo International Correspondent Kristel Kate Cabrales nga agnanaed tatta idiay Naples, Italy.
Segun kenkuana, sa laeng makaruar dagiti tao no mapanda gumatang kadagiti kasapulanda ken kunana nga amin nga ospital ti nasao a pagilian ken naaramat aminen a kas COVID-19 hospital isu a no adda sagsagabaen ti maysa a tao ket pagtalinaedenda kadagiti pagtaenganda agingga nga isudanton ti tumawag ti ambulansia a mangala kadakuada no kas man bilang kumaro ti kasasaadda.
Malaksid iti dayta, amin a bangkay dagiti natay iti COVID-19 ket ma-cremate ken saanen a maipalubos pay ti funeral service.
