VIGAN CITY – Saan pay laeng a mapalubosan a dumalyasat iti ili ti San Emilio dagiti mapan agpasyar idiay Quirino skyline bayat ti pannakaipatungpal ti nainget a restriksyon gapu ti umuna a kaso a nairekord.
Iti pannaki-uman ti Bombo Radyo Vigan ken ni Mayor Joey Bragado, ti addang ti nasao nga ili ket tapno lapdan a makastrek ti Covid19 itu lugarda ken saanda pay laeng a maibaga no kaano a maikkat ti nasao a pagannurotan.
Nabayag nga awan ti kaso iti San Emilio ngem idi March 26, nairekord ti umuna nga isu ti IS-C473 a simmangpet idi March 15 manipud National Capital Region ket kalpasan ti walo nga aldaw idi March 23 naipakaammo iti Municipal Health Office a ti pasyente ket naggurigor, nagsakit ti bagbagina, naguyek ken narigatan nga umanges.
Naidalan iti antigen test ket positibo isu a na-swab test nga idi March 26 ket rimuar a positibo ti resultana. Nupay kasta, naka-isolate dagiti nakapulapolna iti San Emilio Isolation Fcaility bayat ti panangur-uray iti resulta ti RT-PCR test da.
