VIGAN CITY – Limitado laeng iti sangagasut a tattao ti makastrek iti St. Peter Basilica – Rome, Italy kagiddan ti pannakarambak ti maika-lima gasut nga anibersaryo ti kristyanismo ti pagilian agsipud ti panagpangato iti kaso ti Covid ta inton bigat ket malockdown pay ti nasao a pagilian.
Iti pannaki-uman ti Bombo Radyo Vigan ken ni Rev. Ricky Gente, sangapulo a padi laeng ti mapalubosan a makastrek pakairamanan ni Cardinal Luis Antonio Tagle ken ti Cardinal Vicar of Rome a ni Angelo De Donatis idinto a dagiti Pilipino a mapan makipagrambak iti square ket agpatingga laeng iti 2,500 agingga 3,000.
Nagyaman ni Gente nga uray no adda pandemya ket adda latta gundaway ken bendisyon ti Papa a maaramid ti selebrasyon ken numan pay maladingitan gapu ta limitado laeng ti makapan ket adda ti telebisyon ken social media a pakabuyaan iti misa ket kalpasanna, maaramid ti Angelus sakbay nga agmensahe ti Santo Papa ken mangbendisyon.
Nupay kasta, napalagipan dagiti mapan makipagrambak ita nga aldaw a mangitugotda iti bandera ti Pilipinas wenno bandera iti grupoda wenno komunidad.
