VIGAN CITY – Pinasingkedan ni Provincial Board Member 2nd District Mildred Elaydo a naisayangkat iti Committee hearing kadua dagiti Public Utility Bus Operators idi November 24.
Iti pannaki-uman ti Bombo Radyo Vigan ken ni Elaydo, ti nasao a panagdenggeg ket kagiddan iti panangipakammo ni Gov. Ryan Singson iti kinasaganan ti panaglukat kadagiti border iti probinsia para iti public utility bus a ti ruta ket Manila-Vigan ken Manila-Candon.
Segun ken ni Elaydo, nupay kayat ti provincial government a maipatungpal iti panaglukat para kadagiti public utility bus inton December 1 ket kitkitaenda pay laeng iti nasayaat a maaramid ta adu iti proseso ken dumalananna para iti pannakaipatungpalna.
Numan bilang a maipatungpalton iti nasao a banag ket kasapulan a suruten iti health and safety protocols ket kasapulan pay iti agpa-book dagiti pasahero iti tallo nga aldaw sakbay iti panagbiahe.
Inlawlawagna a maibasar iti guidelines nga inaramid ti probinsia ket masapul a nu makadanon iti border dagiti pasahero ket dimmalan iti antigen test, addaanda iti travel pass, certification manipod local government unit, travel pass ken dadduma pay a kasapulan dokumento.
Innayonna pay a point-to-point iti panagbiahe dagiti bus ket nu makadanondan iti probinsia ket sabaten ti LGU-concerned nga isu iti mangitulod iti pasilidad a pag- quarantine-anda.
