VIGAN CITY – Tallopulo nga Improvised Polyvinyl Pyrotechnic Device wenno BOGA ken maysa a pakete ti pikolo ti naisuko manipud kadagiti tallo a barangay iti ili ti Sta. Lucia ken iti Rizal, Cabugao.
Insuko dagiti residente iti ili ti Sta. Lucia dagiti boga babaen kada Barangay Captain Romeo Vilog iti Barangay Bani; Barangay Captain Reynaldo Visico iti Barangay Paoc Sur; ken Barangay Captain Elvira Tougan iti Barangay Arangin.
Nangisayangkat dagiti kameng ti Sta. Lucia Police Station iti Aggressive/Massive Campaign mainaig iti Executive Order 28 ken Republic Act 7183 ken ti Oplan ARIRANG on Illegal Firecrackers kadagiti barangay iti ili ti Sta. Lucia ket iti panagbisitada kadagiti pagtaengan, boluntaryo nga insuko dagiti residente manipud kadagiti nasao a barangay ti duapulo ket maysa a piraso ti nadumaduma a boga nga aggatad iti nasurok kumurang 2,100 a pisos.
Kabayatanna, idiay met Barangay Rizal, Cabugao ket insuko ni Wendel Aganad Rafanan, agtawen iti tallopulo ket tallo, construction worker a taga-Barangay Alinaay ti maysa a pakete ti pikolo nga awan markana a daytoy ket ginatangna idi napan a tawen idiay Metro Manila.
Malaksid dayta, siam a piraso met ti boga ti boluntaryo a naisuko iti nasao a barangay kabayatan ti barangay information drive kontra iti iligal a paputok.
Dagiti naisuko a paputok ken improvised boga ket nakakustodian iti Cabugao Police Station para iti proper disposition.
