VIGAN CITY- Tallo a suspek ti nakemmeg iti nagsisina a buy-bust operation idi kalman idiay ili ti Nagbukel, Tagudin ken Sta. Catalina.
Immuna a nakemmeg ni Tito Capao-An ,agtawen ti uppat a pulo ket pito ,naasawaan, tricycle driver ken taga Barangay Balaweg, Nagbukel iti buy-bust operation idiay Barangay Poblacion West, Nagbukel ket naala kenkuana ti dwa a sachet iti maatap a shabu ken sangaribo a piso a kuarta a buybust money.
Segun kenni Police Senior Inspector Paul Arreola, hepe ti Nagbukel Police Station, maysa a drug surenderee ti suspek ken naturpos na iti community based rehabilitation program ngem naduktalan a nagsubli iti iligal nga aramid.
Kabayatanna , idiay Barangay Malacanang, Tagudin iti pasado alas kuatro idi kalman ket nakemmeg ni Leonardo Ordinario Jr., agtawen ti tallo pulo ket lima, naasawaan, construction worker, drug surenderer ken residente iti nasao a lugar ket naala kenkuana ti dwa a sachet iti maatap a shabu , maysa a sachet ti maatap a shabu a nausar a buy-bust item ken sangaribo a pisos a buy-bust money.
Saan metten a nakapagkitakit pay ni Christopher Rodillas, agtawen ti uppat a pulo ken taga Tamurong ,Sta Catalina idi kemmegen dagiti otoridad ta naaktuan da nga aglaklako ti iligal a droga iti naisayangkat a buy-bust operation iti batog ti pagadalan idiay Pangada ,Sta Catalina.
Pinatalgedan ni Police Senior Inspector Christopher Ramat, hepe ti Sta. Catalina Municipal Police Station, a nagturpos met laeng ti community based rehabilitation program ti suspek ngem nagsubli iti iligal nga aktibidad.
