Tallo nga ubbing ti pinang-or ti maysa a lalaki nga adda parikut ti panagpampanunotna babaen iti kayo idiay Barangay Cabaroan, Bantay, Ilocos Sur.
Dua kadagiti ubbing ti agtawen iti dua ken maysa ti agtawen iti tallo.
Ti met suspek ket agtawen iti tallopulo ket siam.
Iti pannaki-uman ti Bombo Radyo Vigan iti ina ti agtawen-iti-dua nga ubing, aglablaba idi iti dayta a gundaway idin ta nakitana laengen ti kabsatna a mangbagbagkat iti anakna nga agkapkapsut gapu iti pannakapang-orna.
Ti met maysa nga ina a nakin-anak iti agtawen iti dua met laeng, nakigtot idi napasamak ti pammang-or ta karaman met laeng ti anakna a nadunor isu nga intarayda met iti ospital.
Kabayatanna, ti ina ti agtawen-iti-tallo nga ubing ti nakakita iti pasamak isu a nagiryag iti dayta a gundaway ket napan met inubor ti asawana ti suspek.
Ti anakna a nakasagrap iti bukol ken nadaraan ti utekna ket nakaruar metten iti ICU ta ngem agtaltalinaed pay laeng iti ospital.
Segun met iti ina ti suspek, uray isuna ket madangdangran ti anakna ta nabayagen nga adda parikut iti panagpanunotna ken impaagasda idin ngem madina kayat ti agtumar.
Kinunana nga idi napasamak ti pammang-or ket awan pulos ti nagbambantay kadagiti ubbing.
Malaksid dayta, innayonna pay a ti pagbutnganda ita ket dagiti mangpangpangta ken mangub-ubor kadakuada gapu iti napasamak.
Nupay kasta, kiddaw dagiti tallo nga ina a matulongan ida iti panagpaagas dagiti annakda.
