VIGAN CITY – Tallo a tattao a sumangsango ti kaso ti nakemmeg ti nadumaduma a paset ti probinsya.
Immuna a nakemmeg ni Teresita Villa agtawen ti pito pulo ket siam, retirado a clerk ti korte ken agnaed ti Brgy. San Isidro, San Juan a mabilang a Top 1 Most Wanted Person ti probinsya ti Ilocos Norte.
Nakemmeg ni Villa babaen ti bileg ti warrant of arrest nga imparruar ni Hon. Felix Salvador, Presiding Judge ti RTC Branch 17, First Judicial Region, Batac City, Ilocos Norte ta naglabsing ti namin sangapulo ket lima a daras ti Republic Act 8791 wenno General banking Act of 2002 nga adda ti pakabuklan a siam a gasut a ribo a pisos a piyansana.
Simmaruno a nakemmeg ni Ricardo Mondejar nga agnaed ti Brgy. Calongbuyan, Galimuyod ta sumangsango ti kaso a Grave Threat nga adda ti nailatang a piyansa a innem a ribo a pisos para iti pannakawayawayana a ti warrant of arrest na ket imparruar ni Judge Richard Tagasa Domingo ti RTC Branch 23, Candon City.
Kaso a panaglabsing ti RA 9262 wenno Vioilence Against Women and their Children Act ti linabsing a kaso ti maibilang a Top 4 Most Wanted ti ili ti Caoayan a ni Eodelito Quilana agtawen ti tallo pulo ket lima nga agnaed ti nasao nga ili.
Ti warrant of arrest na ket imparruar ni Acting Presiding Judge Hon. Leah Agripina Ramirez Florendo ti Branch 20, Vigan City ken nailatang ti tallo pulo ket innem a ribo a pisos a piyansa para iti temporaryo a pannakawayawayana.
