VIGAN CITY – Tallo ti nakemmeg gapu ti kasoda nga estafa iti entrapment operation a naisayangkat iti Candon Beach Resort, Brgy. Darapidap, Candon City.
Segun ti Candon City Police Station, dagiti nakemmeg ket da Mayonor Gerona Alipio, agtawen ti uppat a pulo ket maysa, naasawaan, agent nga agnaed idiay Purok 1, Barangay. San Juan, Guagua, Pampanga; Eva Bruza Alerta, agtawen ti uppat a pulo ket uppat, housewife nga agnaed idiay Mabalacat, Pampanga; ken Eliseo Borado Ornopia, agtawen ti uppat a pulo ket uppat, naasawaan, negosyante nga agnaed idiay Mabalacat, Pampanga; idinto a ti biktima ket ni Pedro Dizon Yabut, agtawen ti pitopulo ket innem, negosyante nga agnaed idiay Abaya St. Barangay San Isidro, Candon City.
Insayangkat dagiti pannakabagi ti linteg ti entrapment operation iti nasao a lugar a gappuanan ti pannakakemmeg dagiti suspek ta nakaawat ti biktima iti dua a piraso iti sangaribo a pisos ken P400,000 a boodle marked money manipod kadagiti suspek.
Nagkiddaw dagiti suspek ti bayad ti transfer of land title-da idiay San Isidro, Laog, Mexico City, Pampanga iti salinong ti nagan ti biktima, ngem indeliver dagiti suspek dagiti peke a dokumento.
Immunan a nakabayad ti biktima iti umabot P971,000 kadagti suspek ngem nagkiddawda manen ti P900,000 isu a nagpatulongen iti National Bureau of Investigation isu a naaramid ti entrapment operation kontra kadagiti suspek.
Addan ti kustodiya ti Candon City Police Station dagiti suspek ken maisagsagsanan ti kaso a maipila kadakuada.
