VIGAN CITY – Panaglabsing iti Presidential Decree 449 wenno Illegal Cockfighting ti sangwen dagiti tallo a nagtutupada idiay Brgy. Pula, Tagudin.
Nabigbig dagiti suspek a da Ruel Gonzales, agtawen iti uppat a pulo ket innem, Paquito Puzon, agtawen iti uppat a pulo nga agpada a taga-Brgy. Pagdaraoan, San Fernando City, La Union ken ni Ronald Ferrer, agtawen iti limapulo ket maysa a taga-Bucao West, Tagudin.
Pinasingkedan ni PCapt. Jose Bandong II a nangiwayatda iti anti-illegal gambling operation ket naaktuanda dagiti nasurok kumurang sangapulo nga agtutupada ngem tallo laeng ti natiliwda.
Naala kadakuada ti ti uppat a piraso ti pangtadi a manok, dua a karton ken maysa a bayong nga adda itan kadagiti pannakabagi ti linteg pakairamanan dagiti suspek tapno dumalan iti husto a proseso.
