VIGAN CITY- Natay ni Edgar Baldo nga agtawen iti uppat a pulo ket walo, naasawaan, ken agnaed idiay Barangay Aragan, Cabugao gapu ti pannaka-aksidente iti nagluganan na a motorsiklo idiay national highway ti Barangay Bungro, Magsingal idi rabii, alas otso.
Naamuan nga agpapabagatan ti biktima a sar-sarunwen na ti Isuzu Dump Truck a minanenho ni Ruel Quisedo nga agtawen iti dua pulo ket uppat, naasawaan, ken agnaed idiay Dacutan, Magsingal, idi nakadanun da iti nakapasamakan iti aksidente, ti motorsiklo ti biktima ket tinukbob ti sumar-saruno kenkuana a Toyota Altis a minanenhyi ni Samuel Forneas nga agtawen iti uppat a pulo, naasawaan, mannalon, mapapati a nakainom ti arak ken agnaed idiay San Julian Norte, Vigan City.
Uray nu nakahelmet ti biktima a nagmaneho iti motorsiklo, nakaro a dunor iti ulo ti sinagaba na ket uray nu naitaray idiay Magsingal District Hospital ket naideklerar a dead on arrival idinto a dagiti nagmaneho ti Isuzu Dumped Truck ken Toyota Altis ket saan a naan-ano.
