VIGAN CITY -Nakemmeg idiay San Julian, Magsingal ni Bethsaida Sagsagat, agtawen iti uppat a pulo ket maysa a taga-Brgy Bacar gapu ti panaglabsingna iti The General Banking Act of 2000.
Napetsaan iti December 27 ti warrant of arrest ti suspek ken nailatangan iti PHP60K a pyansa para ti temporaryo a pannaka-wayawayana.
Panaglabsing iti Anti-Cattle Rustling Law of 1974 met ti nakakemmegan idiay Puro, Magsingal ni Ronnel Tabigne, agtawen iti duapulo ket uppat, mangngalap a taga-Namruangan, Cabugao.
PHP108K ti nailatang a pyansa para ti temporaryo a pannakawayawayana ken ti warrant of arrest na a napetsaan iti December 10 ket imparuar ni Judge Homer Jay Ragunjan iti Regional Trial Court, Branch 24, Cabugao.
Ni met Maricris Cariño, agtawen iti duapulo ket lima a taga-Poblacion Sur, Burgos ket nakemmeg gapu ti panaglabsingna iti Motorcycle Helmet Act of 2009. Dua a ribo a pisos ti mabalinna a pagpyansa tapno mawayawayaan.
