VIGAN CITY – Tallo a wanted person ti nakemmeg babaen iti bileg ti warrant of arrest manipud iti maysa a siudad ken dua nga ili iti probinsia.
Immuna a nakemmeg idiay Barangay Poblacion, San Vicente ni Reynaldo Valdez, agtawen iti uppat a pulo ket siam, tricycle driver a taga-Barangay IX, Cuta, Vigan City gapu ti kasona a theft.
Inruar ti First Municipal Circuit Trial Court, Claveria, Cagayan ti warrant of arrest ni Valdez a napetsaan iti April 22, 2022 ken nailatangan iti sangapulo a ribo a pisos para ti temporaryo a pannaka-wayawayana.
Idiay met Barangay San Nicolas, Candon City ti nakakemmegan ni Eric Gramaje, agtawen iti tallopulo ket maysa nga agnaed iti nasao a lugar gapu ti kasona nga Slight Physical Injuries.
Inruar ti Presiding Judge iti Family Court Branch 8, Candon City a napetsaan iti October 10, 2022 ken nailatangan iti pyansa a lima ribo a pisos para ti pannaka-wayawayana.
Maysa a Top 1 Municipal Level met ni Noel Soliven Valdez, agtawen iti tallopulo ket uppat, taga-Barangay Poblacion,Quirino a nakemmeg idiay Balas-iyan River, Sitio Cabaroan, Barangay Patungcaleo iti nasao nga ili.
Kaso a theft ti sangsangwen ni Valdez a ti warrant of arrest na ket inruar ti Presiding Judge iti Municipal Circuit Trial Court, Cervantes-Quirino, napetsaan iti October 4, 2022 ken nailatangan iti innem a ribo a pisos a pyansa para ti temporaryo a pannaka-wayawayana.
