VIGAN CITY – Kaso a panaglabsing ti Republic Act 10591 wenno ti illegal possession of firearms and ammunition act iti nakakemmegan ni Arnel Tabisula, agtawen ti uppat a pulo ket siam, mannalon nga agnaed idiay Brgy. Sived, Sto. Domingo.
Nakemmeg ti suspek babaen ti bileg ti warrant of arrest a napetsaan idi January 23 iti agdama a tawen nga imparuar ni Hon. Corazon Cecilia Dulay, presiding judge ti Regional Trial Court, Branch 21, Vigan City.
Ti sabali a bangir, kaso a frustrated murder ken attempted murder iti nakakemmegan idi kalman ni Danilo Cabalejo Buquing alyas Evaristo Buquing Jr, Danilo Buquing, Dandi Buquing, Danding Buqing wenno Dandi Boquing, agtawen ti lima pulo ket uppat ken agnaed idiay Brgy. Baluarte, Salcedo.
Nakemmeg ti suspek babaen ti bileg ti warrant of arrest a napetsaan ti March 23, 2018 nga imparuar ni Hon. Gina Juan-Chan, Judge ti Regional Trial Court, Branch 23, Candon City.
Kabayatanna, nakemmeg pay babaen met laeng iti bileg ti warrant of arrest ni Cirilo Corrales, agtawen ti lima pulo, mannalon ken agnaed idiay Orence, Narvacan gapu iti kaso a reckless imprudence resulting to damage to property.
Napetsaan ti February 19 ti warrant of arrest ti suspek nga imparuar ni Hon. Geraldine Ramos, Presiding Judge ti 4th Municipal Circuit Trial Court, First Judicial Region, Narvacan.
