VIGAN CITY – Tallo ti nadangran pakairamanan ti maysa a pulis iti panagdinnungpar ti kotse ken SUV idiay Barangay Sacuyya Norte, Santa, Ilocos Sur.
Ti Toyota Vios ket minaneho ni PCPL. Nilmor Legaspi Reyes, agtawen iti duapulo ket, naidestino iti PNP-DEG SOU1, taga-Barangay Turod, Narvacan.
Ti met Honda CRV ket minaneho ni Dennis Michael Bugayong Balbas, agtawen iti tallopulo ket walo, taga-19 Narig Street, Project 7, Quezon City.
Inluganna ni Diana Emmanuelle Pichay Balbas, agtawen iti tallopulo ket siam, taga-Gen. Luna, Laoag City, Ilocos Norte.
Agpapa-amianan ti kotse idinto nga adda iti bangir a linya ti SUV ket idi madanonda ti nakapasamakan ti insidente, nag-overtake ti drayber ti SUV isu a napan iti bangir a linya.
Kinabig ti drayber ti kotse ti manibelana nga agpakannawan tapno lisyanna ti SUV ngem nagdinnungparda latta.
Nagsagaba iti minor injuries dagiti dua a drayber idinto a ti inlugan ti SUV ket agalenna ti nasakit a takyagna.
Naipaagas dagiti karaman iti aksidente iti Ilocos Sur Provincial Hospital – Gabriela Silang, Tamag, Vigan City para iti naan-anay a pannakatamingda.
