VIGAN CITY – Tallo ti natay idinto a maysa ti kritikal ti kasasaadna iti napasamak nga aksidente iti national highway ti Barangay Gongogong, San Ildefonso a nakairamanan ti maysa a van ken dua a motorsiklo.
Nabigbig ti nagmaneho iti Hyundai Starex Van a ni Dionisio Rodriguez Maristela, agnaed iti Nagsabaran, San Juan.
Ti met nagmaneho iti Yamaha NMAX ket ni MJ Tamayo, agnaed iti Magsingal ken ti backride na a ni Rodel Palacpac, agnaed iti Solid West, Vigan City ken ni Andrei Fermato, agnaed iti Busiing Norte, San Ildefonso.
Kabayatanna, minaneho met ni Gian Marco Ortiga Domingo, agnaed ti Balaleng, Bantay ti PCX a motorsiklo.
Iti pannaki-uman ti Bombo Radyo Vigan ken ni Police Captain Alberto Ramos, agpapa-abagatan dagiti dua a motorsiklo idin ta idi nadanunda ti nakapasamakan ti aksidente, saan a nakontrol ti drayber ti van ti manibela iti luganna ket napan iti bangir a linya nga isu ti pannakaidungparna kadagiti dua a motorsiklo sakbay a naidungpar iti concrete barrier ti rangtay.
Gapu dayta, nagsagaba amin iti nakaro a dunor dagiti karaman iti aksidente a naipaagas iti ospital para iti pannakatamingda ngem saan a nakalasat dagiti dua a nagmaneho iti motorsiklo ken ti maysa pay a naglugan iti NMAX a ni Palacpac.
Naduktalan met a nakainom dagiti karaman iti aksidente.
