VIGAN CITY – Tallo iti nadundunor gapu iti aksidente ti dua a motorsiklo iti national highway Brgy. Dardarat, Tagudin.
Segun ti Tagudin Municipal Police Station, dagiti karaman iti insidente ket ti nagmaneho iti Black XRM 125 motorcycle a ni Manolo Pablo Dalog, agtawen iti limapulo ket dua, naasawaan, mannalon nga agnaed iti Sitio Kiblongan Brgy. Uso, Suyo idinto a ti nagmaneho ti Blue Gravis MIO Yamaha 125 motorcycle ket ni Anthony Tomines Narag, agtawen iti limapulo ket lima, Brgy. Kagawad nga agnaed idiay Brgy. Sawat, Tagudin kaduana ti backriderna a ni Joy Cuaresma Dela Cruz, agtawen iti tallopulo ket walo, naasawaan, awanan trabaho nga agnaed idiay Brgy. Dardarat, Tagudin.
Maibasar iti inisyal nga imbesdtigasyon, napaspas nga agpapabagatan a direksyon ni Dalog idi aksidente a nadungparna iti bumallasiw a ni Narag a gappuanan iti pannakadundunorda ken naipan iti Ilocos Sur District Hospital, Brgy. Bio, Tagudin para iti pannakatamingda.
Kabayatanna, saan pay nga ammo nu mano iti gatad ti nadadael a paset dagiti lugan nga addan iti kustodiya dagiti Brgy. Official iti Barangay Dardarat, Tagudin.
