VIGAN CITY– Nawayawayaanen dagiti tallo a nakemmeg a nagsusugal wenno naglabsing ti Presidential Decree 1602 wenno Anti-Illegal Gambling idiay Barangay Las-ud Sta.Cruz kalpasan a naka-piansa da ti Php15,000 iti tunggal maysa.
Iti pannaki-uman ti Bombo Radyo Vigan ken ni Police Major Vincent Paul Tadeo iti Sta. Cruz Municipal Police Station, nakaawatda iti report mainaig ti panagsusugal dagiti suspek iti nasao a lugar.
Segun ken ni Police Major Tadeo, namin-adun a daras a nabagbagaan dagiti suspek ngem awan ti dengdenggenda.
Kalpasan a nakumpirmaranda nga adda nagsusugal, nangisayankat ti Sta. Cruz Municipal Police Station iti Anti-illegal operation, ket dita a nakemmeg dagiti suspek nga agay-ayam ti “Tong-it”, ken nakakumpiskaranda iti maysa a set ti baraha, kayo a lamisaan, tallo a tugaw, ken pusta a Php590.
Kiddaw ni Police Major Tadeo kadagiti bumarangay nga i-report da dagiti makitada nga agsusugal, wenno aniaman nga illegal nga aktibidad.
