VIGAN CITY – Tallo a pagadalan manipod iti Ilocos Sur iti nakaala iti National Awards for Brigada Eskwela 2021 ti Department of Education.
Iti naisayangkat nga awarding ceremonies ket nakablaawan ti Schools Division Office iti Ilocos Sur ta tallo a pagadalan ti nakaawat ti pammadayaw pakairamanan iti Mabilbila Integrated School, Libtong Integrated School ken San Pedro National High School kasta pay a naala ti Mabilbila Integrated School iti Hall of Fame Award ken Special Award.
Dagiti special award a naawat iti Mabilbila Integrated School ket pakairamanan ti Best School Community Home Partnership, Best Home Learning Spaces, Best Partnership Engagement Activity, Most Prepared School.
Gapu ti dayta, nagyaman ti DepEd-Ilocos Sur kadagiti stakeholder gapu iti awan sarday a suportarda para iti pagsayaatan dagiti pagadalan iti probinsia.
Kabayatanna, pinasingkedan ni Education Sec. Leonor Briones a ti brigade eskwela ket mangipaay iti opurtunidad a mangkita iti learning resource gaps ken panagsagana kadagiti pagadalan para iti panagrugi ti klase a kas iti panangkita kadagiti masimpa.
Innayonna a ti nasao nga addang ket agtitinnulong para iti gagem a tulongan dagiti agad-adal ken mangisursuro.
