VIGAN CITY – Panaglabsing met laeng iti Presidential Decree 1602 iti sangwen dagiti tallo a nakemmeg gapu iti panagsusugalda idiay Sitio Nalasin, Brgy Camangaan, Vigan City.
Dagiti suspek ket da Freddie Raguindin Cabalo, agtawen iti uppat a pulo ket maysa, naasawaan, awanan trabaho; Rosalinda Flores Quitasol, agtawen iti tallopulo ket innem, naasawaan, housewife; ken Nenita Secuya lauron, agtawen iti uppat a pulo ket pito, naasawaan, awanan iti trabaho nga agpapada nga agnaed iti nasao a lugar.
Naaktuan dagiti pannakabagi ti linteg iti panagay-ayam dagiti suspek ti tong-its iti uneg iti pagtaengan ni Rosalinda iti naisayangkat nga Anti-Illegal Gambling Operation iti nasao a barangay.
Kabayatanna, naala kadakuada iti limapulo ket dua a piraso iti baraha, tallo a monoblocks a tugaw, maysa a kayo a lamisaan ken P145 a pusta.
Naipan iti Vigan City Health Office dagiti suspek para iti medico legal ngem iti agdama ket addadan iti kustodiya iti Vigan City Police Station tapno dumalan iti husto a proseso.
